انصار: (د لیندۍ ۲۰ مه)، د طالبانو د حکومت د ټولګټو چارو وزارت ویاند محمد اشرف حق شناس وایي، چې د سالنګ لویه لار د روان لمریز کال د مرغومې(جدي) تر څلورمې نېټې پورې د لویو مسافر وړونکو موټرو پرمخ وتړل شوه.
د حق شناس په وینا، دغه ګام په وروستیو څو ورځو کې د شدیدې واورې د ورېدو او ورسره مل طوفان او د دې سربېره د کنګل له کبله د فرغي لارې د ظرفیت د کموالي له کبله اخیستل شوی دی.
نوموړي زیاتوي، چې کوچني مسافر وړونکي موټر د دې مسیر له فرعي لارې تګ-راتګ کولی شي او د سالنګ عمومي لویه لاره به د مرغومې (جدي) په ۴مه نېټه پرانیستل شي.
د سالنګ لویه لار هرکال د ژمي په راتګ سره وخت ناوخته د مسافرو پر مخ تړل کېږي.
پر دې لار تلونکي مسافر ګیله لري، چې دا مهمه لویه لار د وخت د حاکمو نظامونو د بې پروایئ له امله وخت نا وخته د مسافرو پرمخ تړلې وي.
URL تعقيب: https://www.ansarpress.com/pashto/34759
